Na, Hombes, hosche de Sunndaach gut iwwerschdann? Erwin, merr ware uffem Land esse; glaabsch nit wi gut. In Owwerschtreit ware merr in so'rer kleen Werrtschaft.
Hombes, wo leit dann Owwerschtreit?
Du weesch awwer rein nix; direkt hinner Waldbeggelum geht's hoch, dort leit's hinner de Beije im Loch.
Awwer noch e'mol, merr honn gess, Du glaabsch's jo nit. Mei Freind haft e Rumschdeek, dass hot hiwwe un driwwe iwwer de Deller gehonk. Mei Fraa wollt e'Schnitzel, dere honn'se gleich zwee uff de Deller geleet, vor's selwe Geld, weesche mei Fraa guckt immer so hungrich, un ich hatt'e Kotlett so groß wi'je Abtrittsdeckel. Kannsch derrs nit vorschdelle! Mit Salat un allem drumm un draan, aach Markkleesjessupp hadde'se. Wi fein, wi bei meine Mudder deheem, frihjer!
Ei, Hombes, wi bischen do draan komm? Ei, mei Freind Adolf geht do effdersch hiin, weils so gut un billich war, seet'er. Sunnscht duut der beim Lafer esse, doch in 0wwerschtreit seet'er, war's so scheen gemiitlich un dort kennt merr sich so richdich abbinne. Er hatt recht!
No'm Esse hommer uns e'bissje di Been ve'tret in sinn rund um das Ertche schbaziirt Wi scheen! Schlisselblummewisse wohiin de geguckt hosch; Milljone, icb liije nit! Gelb ware di Wisse, un di Kerschebeem honn weiß außem Wald gescheint. Owwe, vun de Heeh konn'sche ins Nahedaal gugge hosch de Lemberch mit Duchroth, de Gangelsberch, de Disibodeberch un hinne Odernum gesihn, un rings um de Ort ware Rapsfelder, grad aam uffgehn. Das wa schad, doch di sinn sicher de neegschde Sunndach aam blihje. So e'scheen Pläggelche hosche sicher schunn lang nit mehr gesihn. Es leit in de Berje, wi beim Schneewittche domols.
Nor eens honn ich nit ve'schdann. Di Werrtsfraa, di jung, di ingeheirat hatt, di saat, si deet sich schwer middem lngeweehne, im abge-leejene Owwerschtreit Hombes wo waren di sunnscht her? Ei, di kam vun Owwersterreich, weesche, wo's besunnerscht scheen is. Kee Wunner, daß merr do Zeit brauch for sich inzegeweehne, doch wemmer sunnscht nix gesihn hot, dann gefällt eem aach Owwerschtreit, zumal's aach noch bei uns deheem'is.
Unser Landkreis Kreiznach is for mich es scheenschde Pläggelche uff de ganz Welt. Hombes, das bleibt aach so for Dich. Mach's gut.
Du aach, Erwin. Geh'emol hiin, wenn jetz de Raps bliht.
